Ilinniartitaaneq

Ilinniartitaaneq tassaavoq suliniuteqarfiit pingaarnerpaat ilagisaat, aamma Kalaallit-Nunaata siunissaanut matuersaat. Ilinniartitaaneq ilinniakkanillu qaffassaaneq pinng-itsoorneqarsinnaanngillat, innuttaasut, ullumikkut siunissamilu unammilligassanut, eqqortunik piginnaasaqarlutillu sakkussaqassappata. Kommunalbestyrelsip ilinniartitaanerup killingata qaffassarneqarnissaa sulissutiginiarpaa, taamaaliornikkut amerlanerungaartut akisussaassutsimik tigusinissamut ilinniagaqaleqqullugit, aningaasaqarniarnerullu ataatsimoorunneqarnerani peqataalerlutik. Ullumikkut sulisinnaassuseqartut ilinniagaqaqqissinnaanerat ilinniakkaminnillu qaffassaasinnaanerat annertuumik pingaartinneqassaaq – inuutissarsiutit nutaat sullinneqarnissaat piinnarnagu, kisiannili aamma sivikitsumik, sivisuumillu, suliffissaaleqilertarnerit pinngitsoortinniarlugit.

Taamaattumik Qaasuitsup Kommunia nutaanik eqqarsariaaseqarluni sulissaaq, ilikkagaqarniarneq ilinniartitaanerlu ineriartortinniarlugit, taamaaliornikkut atuisuusut, tassalu meeqqat, inuusuttut, ilinniartitsisut inuussutissarsiuteqartullu, sinaakkutit tigussaasut atorlugit soqutiginnilersinniarlugit, taamaalillunilu ilinniartitaanerup killingata qaffasinnerulernissaa tunngavissiorlugu.  

Anguniakkat

  • Pinnguarnermi, ilikkagaqarniarnermi, ilinniarnermilu ingerlatat inissaqarluartunik siunnerfilinnillu piviusunik sinaakkutaqarnissaat, tamatigut qulakkerneqartas-saaq. Tamanna atuuppoq meeqqanik paaqqinnittarfinni, meeqqat atuarfianni, ilinniarnertuunngorniat ilinniarfiini, inuussutissarsiutinik ilinniarfinni, ilinniaqqiffinni il.il.
  • Ulluunerani paaqqinnittarfiit, atuarfiit, ilinniartut ineqarfiisa il.il. illutamikkut pitsaasuunissaat qulakkeerneqassaaq, ilaatigut iluarsartuussinerit aqqutigalugit.
  • Ilinniagaqarfiit nutaat, aamma neqeroorutit – matumani aamma efterskolit nutaat pineqarsinnaapput, kommunip illoqarfii 8-t eqqarsaatigalugit naleqquttumik inissisimanissaat isumagineqassaaq.
  • Suliniummut ilaavoq inuussutissarsiutilinnik suleqateqarnerup nukittorsarneqarnera, ilaatigut siunertaralugu ilinniagaqarfiit, ilinniartullu inaasa, amerlisinnissaat, ilinniartitsinermut nukiit nutaat allaanerusullu soqutiginnilersinnissaat, aammalu siunnerfilimmik pitsaassumillu inuusuttut siunnersuisoqarnissaat, qulakkeerniarlugu.
  • Ilinniarfinnik nutaanik ineriartortitsinikkut pioreersunillu pitsanngorsaanikkut, ilinniakkat arlallit, ilikkagassallu ilusaasa, ataatsimoortinnerisigut periarfissat ammaanneqassapput, matumani init ilinniartitsiviit/illutallu, kiisalu nunaminertat avatangiisaasut ataatsimoorullugit atorneqarnerisigut. 
  • Avatangiisit ilinniartitsinermut atorneqartartut ineriartortinnerisigut, assigiinngitsunut atorneqarsinnaaneri qulakkeerneqassapput, matumani ilinniartitsinerup saniatigut pisariaqartitanut allanut atorneqarsinnaanngorlugit – assersuutigalugu ineqarfinnut atuumassutilimmik, ataatsimoortarfittut, timersornermut, sullissivinnut il.il.
  • Misissorneqassaaq, Qaasuitsup Kommuniani ilinniarnertuunngorniarfik nutaaq aamma immaqaluunniit højskoli nunarsuarmioqatigiinnut sammititaq, sumi inissinneqarsinnaanersoq.
  • Ataatsimut isigalugu, innuttaasut ilinniagaqartut inissaqarnissaat, qulakkeerneqassaaq, matumani ilinniartunut inissiat aamma iliniartut illui pissutsinut naleqquttut.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 9-4-2014