Toqqissisimaneq inuunerinnerlu

Toqqissisimaneq tassaavoq, ilikkagaqarniarnermi, ineriartornermi inuunerinnermilu, toqqammavik pingaarutilik. Toqqissisimaneq amerlanertigut ilaquttanut ikinngutinullu attuumassuteqartarpoq, aammali avatangiisinut sinaakkuttanullu piviusunut annertummik pingaaruteqartarluni. Taamattumik pingaartuuvoq, nunagisatta aaqqissuunneqarsimanissaa, kikkut tamarmik nunagisami ulluinnarni inuunermi pissusissamisoortumik inooqataasinnaatillugit, katataqarani imaluunnit ataatsimoortuniit immikkoortitaasoqarani.

Anguniakkat

  • Qaasuitsup Kommuniata toqqissimaneq pingaartippaa, tigussaasumik pilersaarusiornermi, innuttaasut tamarmik, sumi najugaqarneq apeqqutaatinnagu toqqissisimanartunik sinaakkutaqarnissaata, eqqarsaatinut ilanngunneratigut.
  • Naapittarfiit pitsaasut, silami illullu iluani ataatsimoorneq toqqissisimanerlu, nukittorsartarpaat. Taamaattumik qulakkeerneqassaaq, inoqarfinni pitsaalluartunik qitiusumik illoqannginninnersaqarnissaa, nunaminertaqarluni, katersortarfeqarluni assigisaanilluunniit, innuttaasut qanoq ukioqassuseq apeqqutaatinnagu ataatsimoorfigisinnaasaannik.
  • Meerartatta inuusuttortattalu toqqissisimasuunissaat nuannaartuunissaallu qulakkeerniarlugu immikkut iliuuseqartoqassaaq – assersuutigalugu pinnguartarfinnik ullutsinnut naaleqquttunik, timersuutinik assigiinngitsunik ingerlatsiviusinnaasunik, timigissarfiusinnaasunik pinngortitamilu misigisassanik, pilersitsinikkut
  • Toqqisisimaneq, ilaatigut illoqarfiit immikkoortortaasa, ataatsimoortarfiit, aqqusineeqqat, atuarfinnut aqqusernit il.il. ilusilersorneranni, pissusissamisoortumik uuttuutitut ilaatinneqartassaaq.
  • Inissiat neqeroorutaasut ilusilersorneqarsimassapput, inuuneq naallugu illoqarfiup immikkoortortaani najugaqartoqarsinnaanngorlugu – tamanna toqqissisimanermik pilersitsisarpoq.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 21-1-2014