Inissiat inoqarfiillu

Inissiat

Ulloq 1.1.2010 Qaasuitsup Kommuniani inissiat 6.072-upput. Inissiat sisamararterutingajaat Namminersorlutik Oqartussanit pigineqarput. 

  • Inissiat 71 %-ii illoqarfinniipput, 2010-mi agguaqatigiisillugu inissiami ataatsimi inuit 2,3-2,7 najugaqarput. Nuna tamakkerlugu agguaqatigiisitsineq 2,4-voq.
  • Inissiat 29 %-ii nunaqarfinniipput, 2010-mi inissiami ataatsimi inuit 1,1-3,4 najugaqarput. Nuna tamakkerlugu agguaqatigiisitsineq 2,3-voq.

Ukiuni kingullerni inoqutigiit ikiliartorsimapput – pingaartumik nunaqarfinni – kisitsisilli takutippaat, illoqarfinni nunaqarfinnilu 40-ini inoqutigiit amerlassusaat annertoqisoq.

Inigisat amerlanersaat tassaapput ilaqutariit illui inissiallu quleriit – katillugit 88,5 %-t. Inissiat 7 %-erluinnanga-jaat ilinniartunut inissiaapput, inissiat 4 %-ii tassaallutik utoqqaat illui.

Qaasuitsup Kommuniani inoqarfimmiit inoqarfimmut ineqarnermi pissutsit assigiinngisitaarnerat atuuppoq, pingaartumillu nunaqarfinni pilersuinerup pitsaassusia appasippoq, amerlasuunilu ineqarniarneq, silataasigut aserfallataaliinermut tunngatillugu, tusiappoq.

Inoqarfiit

Qaasuitsup Kommuniata – nunarsuarmi kommunit anginersaattut – ilisarnaatigaa inoqarfippassuaqarnini – katillugit: illoqarfiit 8-t nunaqarfiillu 32-t. Ilami Kalaallit-Nunaanni nunaqarfiit tamakkeraanni affaat sinnerlugit Qaasuitsup Kommunianiipput. Kommunip innuttai amerliartuinnartut illoqarfiit arfineq pingasuusut ilaanni ataatsimi nunassiortorput. Ulloq 1.1.2013 innuttaasut 76 %-ii illoqarfimmi ataatsimi najugaqarput, nuna tamakkerlugu agguaqatigiisitsinermi 85 %-t illoqarfinni najugaqartut. Nikingassut qularnanngitsumik nunaqarfiit amerlanerujussuannit tunngaveqarpoq.

Ukiuni 35-ini kingullerni ileqquungajussimavoq, inoqarfiit (500 sinnerlugit innuttallit) illoqarfittut pisinnaatitaaffeqalertarnerat, nunaqarfiilli (500 ataallugit innuttallit) milliartorlutillu ikiliartorlutik. Ukiuni qulikkaani kingullerni ingerlaatsip kingunerisimavaa, illoqarfiit siusinnerusukkut pingaruteqarsimagaluartut, soorlu Qeqertarsuaq (siusinnerusukkut Avannaata aqunneqarnerani pingaarnersaasimagaluartoq) Qullissallu (aamaruutissarsiorfiusimasoq) pingaarutaarussimallutk, naak tamatumanerpiaq illoqarfiit allat pingaaruteqarnerusunik atuuffeqalersimasut. Taamaalilluni nunap aqunneqarfianiit ukiuni kingullerni illoqarfiit sisamat Kalaallit-Nunaanni ineriartorfittut pingaartinneqalersimallutik, taakkualu ilagaat Ilulissat. Tamanna aningaasaqarnermi pingaarnersiuinikkut illoqarfimmi ingerlatanut sunniuteqarsimavoq, assersuutigalugu sanaartugassanut tungatillugu, taamaalillunilu alliartornissaanut pitsaasumik tunngavissillugu.

Taaneqareersutut illoqarfiit nunaqarfiillu ilaat innuttaqassutsimikkut appariarfiusimapput, ilaalli nikeriarfiusimanatik alleriarsimallutilluunniit. Ataatsimut isigalugu inuit nunaqarfinniit illoqarfinnut nutseriartuaalersimapput – soorluttaaq aamma nunarsuup sinnerani taamaattoq. Piartuaarneq, Qaasuitsup Kommuniani Kalaallit-Nunaanni sumiiffinni arlaqaqisuni takussaasutut, malunnartiginngilaq.  Piffissami 1977-2012-mut Qaasuitsup Kommuniani illoqarfinni najugallit 4 %-nik amerleriaateqarsimapput (72-miit 76 %-mut). Piffissami tassanerpiaq assersuutigalugu Kommuni Kujallermi qaffariaat 13 %-uvoq.

Kommunip innuttai annermik Ilulissani eqiterussimapput (28 %-t), Aasianni (19 %-t) Upernavimmilu (16 %-t). Kommunip innuttaanit katillugit 63 %-t immikkoortortani taakkunani pingasuni najugaqarput.

Nuuttarnerit ilusaat

Qaasuitsup Kommunianut tassanngaanniillu kiisalu kommunip iluani nutsernerit amerlassusaat ataatsimut isigalugit amerliartorput. Kommunip iluani nutsernerit amerlanersaat illoqarfiup iluani pisarput, tulleralugit illoqarfiit akornanni nutsernerit. Kommunimiit nuuttarnerit, kommunimut nuuttartuniit amerlanerulaarput, tamatumalu Qaasuitsup Kommunia nuuttartut katinneranni annaasaqartippaa. Taamaalilluni 2012-mi nuuttutigut amigartoorutit tassaapput innuttaasut 199-t.

Kommunimi immikkoortortaniit nutsernerit ataatsimut isigalugit Nuuk nutserfiunerpaavoq. Taakkununnga ilaanngilaq Kangaatsiaq, tassami tassanngaannit nutsertut amerlanersaat Sisimiunut Aasiannullu nuuttarput. Uummannamiit Qasigiannguanillu nuuttut amerlanersaat Ilulissanut Nuummulluunniit nuussimapput. Qaanamiit Upernavimmut nutserneq Nuummut nutsernertulli annertutigaaq. Nuup nutserfigineqarneranut tulliullutik illoqarfiit Ilulissat, Aasiaat Sisimiullu nutserfiunerpaapput. Kommunimut nuuttartut amerlanersaat Nuummeersuullutillu Sisimiuneersuupput, ukiut kingullit qulit isigissagaanni.

Nunaqarfinniit nutsernerit amerlanersaat illoqarfimmut qaninnerpaamut pisarput, taassuma saniatigut nunap immikkortortaani nunaqarfinnut allanut. Illoqarfinniit nunaqarfinnut nuunnerit amerlanertigut illoqarfimmiit nunap immikkoortoqatigisamiit pisarput.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 13-11-2014