Ilinniartitaaneq peqqinnerlu

Atuarfiit, ilinniarnertuunngorniarfiit aamma ilinniarfiit ingerlaqqiffiusut

Qaasuitsup Kommuniani meeqqat atuarfii katillutik 41-uupput. Illoqarfinni anginerusuni atuarfiit nalinginnaasumik atualeqqaaniit 10. klassinoorput, atuarfinnili mkinerusuni nunaqarfinniittuni, atualeqqaaniit 7. klassinoorlutik. Meeqqat atuarfinnut tunngatillugu unammilligassat pingaarnerit tassaapput, atuartut ikippallaarneri pingaartunik nunaqarfiit atuarfiini, aamma iluarsartuussisoqarnissaanik pisariaqartitsinerup nukinnginnarsilluinnarnera.

Tamakkua saniatigut Qasigiannguani efterskoleqarpoq – Villads Villadsen-ip efterskolia – atuartunut 80-nut inissalik. Efterskole pingaarnernik pingasunik sammisaqarfiuvoq: Adventure/Outdoor, Ilusilersuineq/Eqqumiitsuliorneq aamma Attaveqaqatgiinneq/IT. Atuarfik pitsaasunik angusaqarfiusarpoq tamannalu atuartut, ilinniarfinnut allanut ingerlaqqittut amerlassusaasigut takuneqarsinnaavoq – tassami atuartut 70 %-iisa missingi atuareernerminni ilinniarfinnut ingerlaqqiffiusunut ingerlaqqittarput.

Kommunip Ilinniarnertuunngorniarfia – Avannaani Ilinniarnertuunngorniarfik – Aasianiippoq 17-nillu ilinniartunut inissiaateqarluni, assigiinngisitaalaartunik ilusilersugaallutillu atuuffeqartunik. Tamakkua saniatiagut GU-Aasiaat illoqarfimmi arlalinnik attartugaqarpoq. Ilinniarnertuunngorniarfimmiit ukiut tamaasa ilinniartut 90-it soraarummeertarput.

Illoqarfiit arfineq pingasuusut tamarmik immikkut Piareersarfeqarput, ukioq ataaseq, inuussutissarsiutinut imaluunnit ilinniarfinnut ingerlaqqiffiusunut qaffassaataasumik/piareersaataasumik atuartitsiviusartunik.

Nunatsinni aalisarnermut piniarnermullu atuarfituaasoq Uummannamiippoq. Tassani piniarnermut aalisarnermullu, ukiuni marlunni atuarnissaq, neqeroorutaasarpoq. Taakkualu saniatigut Ilulissani Perorsaanermik Ilinniarfeqarpoq.

Kommuneplanip suliarineqarneratigut, assersuutigalugu, kommunip atuarfiisa ilinniartoqarfiisalu allilerneqarnissaannut initaasalu pitsangorsarneqarnissaannut, nunaminertanik qulakkeerinnittoqartassaaq. Qaasuitsup Kommuniani illoqarfiit arfineq pingasut qitiusumik ilinniartoqarfiunerat nangittumik nukittorsarneqassaaq, pilersaarusiorfiullu atuutilersussap ingerlanerani, atuarfinnut ilinniarfeqarfinnullu pioreersunut suliniutip annersaa, iluarsartuussinernut allilerinernullu anikinnerusunut tunngatinneqassaaq. Naatsorsuutigineqarpoq, kommuneplanimi nunaminertani pineqartunut attuumassuteqartuni, inissaq naammattoq pineqareersoq.

Peqqinneq

Qaasuitsup Kommunia, Peqqinnisaqarfik Qeqertarsuup Tunua aamma Avannaanut peqqinnisaqarfimmut atavoq, peqqinnissaqarfimmik iluarsaaqqinnermi Januaari 2011-mi atuutilersukkut. Immikkoortortaqarfiit tamarmik napparsimaveqarput, nunap immikkoortuani peqqinnissaqarnermik sulianut pingaarnertut akisussaasunik, taakkua ataanni inissisimapput napparsimaviit aamma qitiusumik peqqissaaviit, kiisalu mikinerusuni niviarsiamut nakorsiartarfiit. Kommunip nunap immikkoortuani napparsimavii Ilulisaniillutillu Aasianniipput, illoqarfiit sinneri arfinillit qitiusumik peqqissaaveqarlutilluunniit napparsimaveqarput, takuuk sammivilersuutit pingaarnerit pillugit nunap assiliorneri.

Aammattaaq peqqinnissamut immikkoortoqarfiit iluiniipput kigutileriffiit, imikkoortortaqarfikkaarlutik ,ataatsimik, marlunnilluunnit tigutit nakorsallit. Kangaatsiaq Qaanaarlu ukiumut ataasiaannarlutik kigutit nakorsaanniit sullinneqartarput.

Peqqinnissaqarfiup 2011-mi iluarsaqqinneratigut aammattaaq telemedicin, ilaatigut innuttaasunut avinngarusimasuni najugalinnut, neqeroorutitut nutaatut atuutilersinneqarpoq. Telemedicin-ip atorneqarsinnaanera pillugu assigiinngiiartunik misilittagaqartoqarpoq, 2013-mili telemedicinip atorneqarnissaanut siunersortimik atorfinitsitsisoqarneratigut, peqinnissaqarfimmiit neqeroorutip ingerlateqqinnissaa ineri-artortinneqarnisaalu aaliangiunneqarput, taamaalilluni eqqortumik sukkanerusumillu, nappatip suunera paasineqarsinnaalerluni, nakorsarneqarneralu aallartillugu.

Taamatut allaanerusumik peqqinnissamut tunngasumik suliniuteqarneq, ullumikkut aaqqissuussaaneq aallaavigalugu suliaavoq, sapinngisamik nuna tamakkerlugu sumiiffinni tamani peqqinnissaqarfik peqatigalugu, digitaliserinerlu aallartinneqareersoq nangeqqillugu. Pinaveersaartitsineq peqqissutsimillu siuarsaaneq immikkut pingaartillugit sammineqassapput – ilaatigut utoqqaat amerlanerulernerisigut, inooriaatsit kingunerinik nappaatit pilersartut amerliartornerisa, akisunerusunik immikkuullarissunillu suliarinneriaaseqalernerup, aammalu innuttaasunut annertunerusumik, pitsaanerusumillu, attaveqartoqalernissaanik piumasaqaataasut kingunerinik, aningaasartuutit annertunerulernissaat, pissutigalugu.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 28-1-2014