Siunissaq imannak isigaarput

Qaasuitsup Kommunia annertuunik periarfissaqarpoq – kommunip angissusianik tunngaveqartumik, aammali kulturit assigiinngitsut pinngortitamilu periarfissat asseqanngitsut aallaavigalugit. Kommuni ataasiinnarmik inuussutissarsiuteqarfiusimagaluarluni – aalisarneq – marlunnut ingerlaqqissimavoq, taakkualu tassaapput aalisarneq takornariaqarnerlu. Taakkua saniatigut aatsitassanik tunisassiorneq – uuliamik, gas-imik aatsitassanillu tunngavilimmik – ukiut arlaqanngitsut iluanni, tassaalersinnaavoq inuussutissarsiutit pingaarnerit pingajuat.

Neriuutigineqartoq tassaavoq, ukiuni aggersuni ineriartorneq, siullertut pingaarnertullu, aatsitassarsiornermut inuussutissarsiutinnullu tamatuma malitsigisaanut tunngasuujumaartoq. Offshore-mik inuussutissarsiutit ineriartornerannut, nunaminertat ineriartornermilu atortorissaarutit pilersaarusianut ilaatinneqareerput, tassaasut sineriammi nunaminertat 25-it illoqarfinni arfineq marlunni aamma nunaqarfinni.

Aalisarnermik inuussutisarsiuteqarnerup ineriartornera, umiarsualiveqarnermi periarfissat annertusarneqarsinnaanerannut, annertuumik tunngassuteqarpoq, matumani pineqarlutik talittarfiit anginerusut aamma aalisakkanik tunisassiornermi allilerinernut periarfissat, aammalu/imaluunniit tunitsiviit nutaat. Taamatullu aamma takornariaqarnerup ineriartorsinnaaneranut periarfissat, siunissami kommunimi angallannermi periarfissat qanoq ittuunerannut, attuumassutilerujussuupput, matumani pineqarlutik umiarsuit takornariartaatit, ilaasartaatillu angalasarnerinut, umiarsualivinnilu tulaffigisinnaasaannut tunngasut, aamma aqqusinertigut attaviulersinnaasut kiisalu pinngortitamut asimilu sunngiffimi ornittakkanut angalanissamut periarfissat. Takornariaqarnerup annertusarnera, aamma sullissivinnut nutaanut unnuiffiusinnaasunullu, annertuumik attuumassuteqarpoq, taamatullu pinngortitami kulturimilu takusassaqqissunut atatillugu, iserfigineqarsinnaasunik nutaanik ineriartortitsinerit, assersuutigalugu Ilulissat Kangerluata eqqaani takusassarsiornermi misigisassarsiornermilu, qitiusumik sullissivik.

Qaasuitsup Kommunia ukiuni aggersuni utoqqarnik, meeqqanik inuusuttunillu, ataatsimut isigalugu appasissunik ilinniagalinnik, amerliartuinnartunik ilungersuuteqalersussaavoq. Suliassaq tamanna ingerlanneqartussaavoq, assersuutigalugu aatsitassarsiornermik tunisassiornerup ineriartornerata kingunerisaanik, ilinniarluarsimasunik sulisussarnerup annertuseruttorfiani.

Unammilligassat allat – periarfissallu allat – silaannaap pisuussasa allangornerisa kingunerattut takuttussat, kommunimi malunniulluarumaarput. Allannguutit, silap kiannerulerneranik, immap sikuata sermersuullu annikinnerulerneranik, nunallu qeriuaannartup tunuariartulerneranik, kinguneqassapput. Tamanna uumasoqassutsip naasoqassutillu, allaqquttussaanngitsumik allangornerannik, kinguneqassaaq, tamakkualu ilagissavaat aalisagaqassutsip, aamma piniartut piniarnissamut periarfissaasa, allanngornerat. Silaannap pissusaasa allangornerat, siuaasatsinniit kingornussarsiatsinnik navianartorsiortitsilissaaq, nunap nakkaassinnaanerata annertusineranik peqquteqartumik, kiisalu nunap qeriuaannartup suujunnaarnerata kinguneranik kulturikkut eqqaassutissat nunamiittut asiujartulissammata.

Illuatungaanili silap kissatikkiartornerata kinguneranik, Avannaani sumiiffiit arlallit ukiup ilangaatsiarsuani takornarianit tikikkuminarnerulissapput. Tamanna ataatsimut isigalugu takornariat siammarnerunissaannut perifissaqalersitsissaaq, aammalu takornariariaatsinik allanik ineriartortitsinissamut periarfissaqalersitsilluni – ilaatigut inoqarfinnut avinngarusimanerpaanut iluaqutaasumik. Naasoqassutsip uumasoqassutsillu allanngornerat piniarnermi aalisarnermilu periarfissanik allanik pilersitsissutaasinnaapput, immaqalu aamma naatitsinikkut imminut pilersorsinnaaneq ikorfartorneqarsinnaalerluni. Taamaatumik pilersaarusiornermi, nunaminertat nunalerinermi misileraanermut atorneqarsinnaasut, ilaatinneqartuassapput.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 14-1-2014